قصيدة بعنوان “مريض نفسي” فديو

0

قصيدة بعنوان “مريض نفسي”

بقلم الشاعرة: دنيا عايد إبراهيم

أنا اللي دايمًا قاعد

جوه أوضتي وحيد

مش شايف نفسي أنفع لأي حاجة

مش شايف نفسي إنسان تاني

ممكن ينفع لزوج وبيت

كتر بُكايا وأفكاري

كِترت مُبالايا ومليت

أهلي بكلام يتعبوني أكتر

ولسه تعبي بيزيد

لا جروحي بتضم في الوحدة

ولا خفيت .. حاسس إني جفيت

على كل اللي حواليا

نفسي أخرج مني

وأسيب الدنيا ديا

نفسي أخرج وأسيب البيت

أسيب أوضتي ووحدتي

وأبطل أحكي للحيط

ولما جريت

أشوف نفسي في مرايا

لقيتني بكيت!

كام شعراية بيضة

ووش شاحب

وسواد تحت عيوني غريب

نسيت..

نسيت شبابي

وكوني زهرة ماتت

وبكيت على الانسان

اللي مات جوايا

ابتديت أضعف تاني

رجعت لأوضتي وأحزاني

بعيط مش عارف

كل ده فات ازاي!!

وازاي هديت أحلامي!

فضلت جوه أوضة

فاتت فيها أيامي

ولا حسيت

بقيت عجوز مع سن صغير

متغير وشي وكلامي

بقيت عصبي وأناني

حتىٰ أصحابي بعدوا عني

وكله سابني لما شافوني بعاني

حتى اهلي فقدوا فيا الأمل!

ياريت الوقت

كان قرص عليا فوقني

كان زماني دلوقتي

في حياة أفضل

مش قادر أفضل على حالي

ولا قادر أبقى غيري

كرهت باب أوضتي

يكون مفتوح

كرهت كلام أهلي

وكل مادي بيزيد جروح

مدبوح في وحدتي وساكت

دايمًا صامد

واديني بحاول أسمع وأعدي

مبقاش الوقت بيعدي!

كرهت حد يسألني: مالك؟

كرهت الكلام والبوح

ومين مين يسمع صرخة مكبوتة؟!

ومين يحس بآلام الروح؟!

.. مين فضل جنبي لما احتجتله؟!

ما أنا الوحيد اللي محدش

ولوحدي بفضل جنب شباكي

لحد ما راسي تميل

من التعب بنام أصحى

أنام تاني ..

كمية وجع ملزماني..!

كإني إنسان ذليل لمرض الوحدة

ومشكلتي

مشكلتي إني مش بقدر أحكي

مشكلتي إني عاجز عن الكلام

حاسس بس إني عايز أعيط

وأخرج كل ده

أخرج الآلام اللي مالية جسمي

بعلامات وسواد

وديااان دموع جوايا

بس مش عارف أخرجها ازاي!

خايف لروحي تخرج معاها

خايف إني أتعب أكتر

ومحدش سامع أصلًا!!

وإيه الحل غير إني أفضل

لوحدي وأحكي لضلي

يمكن يسمعني ..يمكن يفضل!

قصيدة بعنوان “مريض نفسي”

قصيدة بعنوان “ارجعي”

بقلم الشاعرة: دنيا عايد إبراهيم

Leave A Reply

Your email address will not be published.