التنمر وتدمر الإنسان تدريجياً

التنمر وتدمر الإنسان تدريجياً

بقلم: صفوه محمد

– كتير مننا أتعرض لمواقف كتير بقي بسببها بيكره شيء معين في نفسه، سواء كان في شكله أو شخصيته أو علاقته، التنمر واحد من الحاجات اللي بتدمر الإنسان تدريجياً، سمعنا كتير قبل كدا عن واحد انتحر عشان صحابه اتنمروا علي شكله، وواحده جالها توحد من كتر ما بقت رافضه التعامل مع الناس عشان التنمر، حالات كتير اوي وللأسف لا حصر لها، بس يفضل فيه سؤال دايما بيجي علي بالي هو:

مين اللي حط معايير للجمال! سواء الجمال الداخلي أو الخارجي!

مين اللي قال إن البشرة البيضة حلوه والسمرا وحشه!

مين اللي قال إن الرفع جميل والتخن لا، مين اللي قال إن العيون اللي الملونة احلي من السودا؟

في الحقيقة كل ده مسميات وشروط للجمال حطناها عشان نكره الناس في شكلها وشخصيتها، ومش لاقيه ليها اي سبب تاني، ربنا لما خلقنا محطش المعايير دي، احنا والحمد لله اتخلقنا في أحسن صورة وتكوين كلنا بلا إستثناء، ده أختيار ربنا ليك ربنا عمره ما بيعمل أو بيخلق حاجه وحشه سبحانه وتعال

– يمكن التنمر شيء صعب علي اي حد أنه يتقبله أو يتخطاه كدا بسهوله بدون عواقب، بس هل الشخص المتنمر ده خالي من العيوب..! هل اي حد فينا كامل!

أكيد لا طبعا، مافيش اي إنسان كامل الكمال لله وحده، بس كل واحد فينا فيه حاجه بتميزه حاجه تخليه غير الكل ومش موجوده عند حد لأن أنت اتخلقت مميز وهتفضل مميز

التنمر وللأسف شيء صعب جداً، بلاش توصلوا شخص أنه يكون بيكره نفسه أو شكله أو شخصيته عشان كلام الغرض من ( الهزار)، حبوا بعض وحبوا نفسكم أحنا أجمل مخلوق علي الأرض، أحنا أرحم من أننا نأذي حد بكلامنا، الكلام بيجرح وبيأثر جداً، خلوا بالكم من كلامكم أجبروا بخاطر بعض

– مش لازم نعقد بعض ونعقد نفسنا مع إن كل حاجه أبسط وأسهل بكتير من حياتنا دلوقتي

أفتكر دائماً أنك شخص مثالي، شخص جميل تتحب، متخليش التنمر يأثر عليك بالسلب ابداً، مافيش شروط عشان أنت تبقي مميز، أنت مميز بطبعك وفطريتك، حبوا نفسكم زي ما هي لأنها تستاهل أنها تتحب، وأفتكر أن كتير يتمني يبقوا زيك، مش محتاج مجهود عشان تبقي جميل نفسك جميله لوحدها والله